எம்பிலிப்பிட்டி மாவட்ட பொது வைத்தியசாலையின் விசேட சிறுவர் பராமரிப்புப் பிரிவில் (SBU) போதிய மருத்துவ உபகரணங்கள் இல்லாத காரணத்தினால் குழந்தைகளின் உயிருக்கு ஆபத்து ஏற்பட்டுள்ளதாக தெரிவிக்கப்படுகின்றது.
பல உயிர்காக்கும் இயந்திரங்கள் மற்றும் உபகரணங்களுக்கு நீண்டகாலமாக தட்டுப்பாடு நிலவுவதாக வைத்தியசாலை வைத்தியர்கள் தெரிவிக்கின்றனர்
எம்பிலிபிட்டி மாவட்ட பொது வைத்தியசாலை இரத்தினபுரி மாவட்டத்தில் அமைந்துள்ள ஒரு பிரதான வைத்தியசாலையாகும். ஊவா மற்றும் தென் மற்றும் சப்ரகமுவ மாகாணங்களின் எல்லைப் பகுதியில் அமைந்துள்ளமையினால், தினமும் வைத்தியசாலைக்கு வரும் நோயாளிகளின் எண்ணிக்கையும் அதிகமாக உள்ளது.
இந்நிலையில் சப்ரகமுவ மாகாண சபையின் கட்டுப்பாட்டில் இருந்த எம்பிலிப்பிட்டி வைத்தியசாலை, மத்திய அரசாங்கத்தின் கட்டுப்பாட்டின் கீழ் கொண்டுவரப்பட்டு இந்த வருடம் ஜனவரி மாதம் மாவட்ட பொது வைத்தியசாலையாக மாற்றப்பட்டது.
அதன்பின்னர், மருத்துவமனையில் மருத்துவ உபகரணங்கள் இல்லாததால், சிகிச்சை பெற வரும் நோயாளிகள் மிகுந்த சிரமத்துக்குள்ளாகினர். அவற்றுள், விசேட சிறுவர் பராமரிப்புப் பிரிவில் உள்ள குறைபாடுகள் ஒரு பாரிய பிரச்சினையாக உருவெடுத்துள்ளது.
மேலும் வைத்தியசாலை சிறுவர் பிரிவு ஒன்றிற்கு அத்தியாவசியமான இயந்திரங்கள் உள்ளிட்ட பல உபகரணங்களுக்கு தட்டுப்பாடு ஏற்பட்டுள்ளதாக வைத்தியர்கள் சுட்டிக்காட்டுகின்றனர்.
