Author: admin

நாட்டில் இன்னும் இரண்டு மூன்று நாட்களில் உள்ளூர் சந்தையில் கோழியின் விலையை குறைப்பதற்கு தீர்வு வழங்கப்படும் என வர்த்தக மற்றும் உணவு பாதுகாப்பு அமைச்சர் நளின் பெர்னாண்டோ தெரிவித்துள்ளார். கடந்த சில நாட்களாக உள்ளூர் சந்தையில் கோழி இறைச்சியின் சில்லறை விலை அதிகரித்துள்ளது. இதன்போது ஊடகங்களுக்கு கருத்து தெரிவித்த அவர், கோழிப்பண்ணை உரிமையாளர்களுடன் கலந்துரையாடி அவர்களின் பிரச்சினைகள் தொடர்பில் கலந்துரையாட உள்ளதாக தெரிவித்தார். விலையை குறைக்க வேண்டுமானால் கோழிக்கறி உற்பத்தியை அதிகரிக்க வேண்டியது அவசியம் என்றும் அவர் தெரிவித்தார்.

2022ஆம் ஆண்டு தேசிய பாடசாலை ஆசிரியர் இடமாற்றம் தொடர்பில் கல்வி அமைச்சு விசேட அறிவிப்பு ஒன்றை வெளியிட்டுள்ளது. அதன்படி, 31/12/2021 அன்று பணியை முடித்து, ஆசிரியர் இடமாறுதல் கடிதம் பெற்ற அனைத்து ஆசிரியர்களும் ஜூன் 12ஆம் திகதிக்குள் பணியிடத்துக்குச் சமூகமளிக்க வேண்டும். ஒரு ஆசிரியர் மேல்முறையீடு செய்ய விரும்பினால், தலைமையாசிரியர் பணிக்கு அறிக்கை செய்த பிறகு ஆசிரியர் இடமாறுதல் துறைக்கு மேல்முறையீடு செய்யலாம் என்றும் அறிவிப்பில் கூறப்பட்டுள்ளது. இது தொடர்பில் கல்வி அமைச்சின் ஆசிரியர் இடமாறுதல் திணைக்களத்திற்கு நேரில் சென்று பார்வையிட வேண்டிய அவசியமில்லை எனவும் ஆசிரியர்கள் தெரிவிக்கின்றனர். இதேவேளை, மேன்முறையீட்டில் குறிப்பிடப்பட்டுள்ள விண்ணப்பங்கள் மீதான மேன்முறையீட்டுத் தீர்மானம் உடனடியாக அறிவிக்கப்படும் எனவும் உரிய அறிவிப்பில் மேலும் தெரிவிக்கப்பட்டுள்ளது.

இலங்கைக்கு தரம் குறைந்த மருந்துகளை விநியோகித்ததாக குற்றம் சுமத்தப்பட்டுள்ள இந்திய மருந்து நிறுவனம் தொடர்பில் மத்திய மருந்து தர நிர்ணய ஆணையம் விசாரணைகளை ஆரம்பித்துள்ளது. இது தொடர்பான மருந்து தயாரிப்பு நிறுவனமான ‘இந்தியானா’ குஜராத்தில் வழங்கிய கண் கோளாறுகளுக்கு பயன்படுத்தப்படும் மருந்தினால் இலங்கையில் சுமார் 30 பேருக்கு ஒவ்வாமை ஏற்பட்டுள்ளதாக இலங்கை அரசு, தமது அரசாங்கத்திற்கு அறிவித்துள்ளதாக இந்திய ஊடகங்கள் செய்தி வெளியிட்டுள்ளன. அதன்படி, குற்றம் சாட்டப்பட்ட நிறுவனத்தை விசாரணைக்கு அழைத்த இந்திய மருந்து ஏற்றுமதி கவுன்சில், சம்பவம் குறித்து உள் விசாரணைக்கும் உத்தரவிட்டுள்ளது. பாதுகாப்பு நடவடிக்கையாக, சர்ச்சைக்குரிய மருந்தின் உற்பத்தியை தற்காலிகமாக நிறுத்தவும், வழங்கப்பட்ட மருந்தின் இருப்பை திரும்பப் பெறவும் இந்திய நிறுவனத்திற்கு உத்தரவிடப்பட்டுள்ளதாக இந்திய சுகாதார அமைச்சக வட்டாரங்களை மேற்கோள் காட்டி இந்திய ஊடகங்கள் செய்தி வெளியிட்டுள்ளன. கடந்த ஓராண்டில் இந்தியாவில் தயாரிக்கப்படும் மருந்துகள் தொடர்பாக நான்காவது முறையாக குற்றச்சாட்டுகள் முன்வைக்கப்படுவதுடன், இதுபோன்ற சம்பவங்கள் இந்தியாவில் மருந்து ஏற்றுமதி…

பாணந்துறை கிரிபெரியவில் உள்ள இரண்டு மாடிக் கட்டிடத்தில் உள்ள களஞ்சியசாலையில் கொரோனா உடைகள் உள்ளிட்ட சுகாதார உபகரணங்கள் வைக்கப்பட்டிருந்த கிடங்கில் தீ விபத்து ஏற்பட்டுள்ளதாக ஹொரண பொலிஸார் தெரிவித்தனர். தீயை அணைக்க ஹொரண களுத்துறை மொரட்டுவ மற்றும் தெஹிவளை மாநகர சபைகளின் தீயணைப்பு பிரிவுகள் அழைக்கப்பட்டன. கொரோனா உடைகள், முகமூடிகள், சத்திரசிகிச்சையின் போது அணிந்திருந்த ஆடைகள் உள்ளிட்ட பல சுகாதார உபகரணங்களும் அங்கு வைக்கப்பட்டிருந்ததாக பொலிஸார் தெரிவிக்கின்றனர். தீயை அணைக்கும் பணியில் தீயணைப்பு வாகனங்கள் உட்பட 11 தண்ணீர் பவுசர்கள் மற்றும் முப்பது தீயணைப்பு வீரர்கள் ஈடுபட்டுள்ளனர். தீ விபத்தின் போது கட்டிடத்திற்குள் எவரும் இருக்கவில்லை எனவும், தீ விபத்து தொடர்பில் பலத்த சந்தேகம் நிலவுவதாகவும் பொலிஸார் தெரிவிக்கின்றனர்.

61 வயதான லிதுவேனியா நாட்டு பிரஜை ஒருவர் காலி துறைமுகத்தில் கடலில் தவறி விழுந்ததில் உயிரிழந்துள்ளார். சிங்கப்பூரில் இருந்து அபுதாபி நோக்கி பயணித்து கொண்டிருந்த கப்பல், காலி துறைமுகத்தில் நங்கூரமிடப்பட்டிருந்த வேளை குறித்த நபர் கப்பலில் இருந்து இறங்க முற்பட்ட போது, கடலில் தவறி விழுந்துள்ளதாக பொலிஸார் தெரிவித்துள்ளனர். கடலில் தவறி விழுந்த நபர் காலி – கராபிட்டிய வைத்தியசாலையில் அனுமதிக்கப்பட்ட பின்னர் உயிரிழந்ததாக தெரிவிக்கப்படுகிறது.

களு கங்கையின் குடா கங்கையின் மேல் பகுதிகளில் சிறு வெள்ளப்பெருக்கு ஏற்படக்கூடும் என எச்சரிக்கை விடுக்கப்பட்டுள்ளது. எதிர்வரும் 24 மணித்தியாலங்களில் பாலிந்த நுவர மற்றும் புலத்சிங்கள பிரதேச செயலகப் பிரிவுகளில் குடா கங்கையின் தாழ்வான பகுதிகள் வெள்ளத்தால் பாதிக்கப்படும் என நீர்ப்பாசன திணைக்களம் அறிவித்துள்ளது. இதன்காரணமாக குடா கங்கையைச் சுற்றியுள்ள தாழ்வான பகுதிகள் ஊடாக உள்ள பக்க வீதிகள் வெள்ளத்தில் மூழ்கும் அபாயம் உள்ளதாகவும் நீர்ப்பாசன திணைக்களம் அறிவித்துள்ளது.

பிற்போடப்பட்டு வருகின்ற தேர்தலை உடனடியாக நடத்துமாறு வலியுறுத்தி தேசிய மக்கள் சக்தி நாடளாவிய ரீதியில் தொடர் ஆர்ப்பாட்டங்களை முன்னெடுப்பதற்கு தயாராகி வருகிறது. அதன்படி, எதிர்வரும் ஜூன் 8 ஆம் திகதி பிற்பகல் இராஜகிரிய தேர்தல்கள் ஆணைக்குழு அலுவலகத்திற்கு அருகில் தேசிய மக்கள் சக்தியைச்சேர்ந்த அனைவரும் ஒன்றுகூடி தேர்தல்கள் ஆணைக்குழுவை வற்புறுத்துகின்ற ஆர்ப்பாட்டத்தில் ஈடுபடவுள்ளதாக மக்கள் விடுதலை முன்னணியின் பொதுச் செயலாளர் டில்வின் சில்வா தெரிவித்துள்ளார்.

கெக்கிராவையில் நியூசிட்டி எனும் பெயரில் பிரபலமான வர்த்தக நிறுவனம் ஒன்றை அக்குறணைப் பிரதேசத்தைச் சேர்ந்த ஒருவர் நடத்தி வருகின்றார். நேற்றிரவு அவரது வீட்டில் திருடன் ஒருவன் உட்புகுந்து திருட முயற்சித்த சந்தர்ப்பத்தில் அதனை நியூசிட்டி உரிமையாளரின் மனைவி கண்டுள்ளார். அதனையடுத்து தான் தப்பிக்கும் ​நோக்கில் திருடன் தேங்காய் மட்டை உரிக்கும் உளியைக் கொண்டு அப்பெண்ணைக் குத்திக் கொலை செய்து தப்பித்துச் சென்றுள்ளார். இரண்டு பிள்ளைகளின் தாயான முப்பது வயது மதிக்கத்தக்க பெண்ணொருவரே இவ்வாறு பரிதாபகரமாக படுகொலை செய்யப்பட்டுள்ளார். சம்பவம் தொடர்பில் பொலிசார் மேலதிக விசாரணைகளை மேற்கொண்டுள்ளனர்.

பௌத்த மதத்தை விமர்சிக்கும் உரிமை இங்கு எவருக்கும் கிடையாது என முன்னாள் ஜனாதிபதி மைத்திரிபால சிறிசேன தெரிவித்துள்ளார். கொழும்பில் இடம்பெற்ற ஊடகசந்திப்பின் போதே அவர் மேற்கண்டவாறு குறிப்பிட்டார். மொழிகளும் மதங்களும் வேறுப்பட்டாலும் ஒவ்வொரு மதங்களையும் மதிக்க மனிதர்கள் தெரிந்துக் கொள்ள வேண்டும் என்றும் அவர் தெரிவித்துள்ளார். இதன் ஊடாக அரசியல் செய்ய பலரும் முயற்சிக்கிறார்கள். கடந்த காலங்களில் எல்லாம் இதுபோன்ற பல வரலாறுகள் காணப்படுகின்றன. வெறுப்புப் பிரசாரங்களை செய்யும் நபர்கள் மற்றும் நிறுவனங்களுக்கு வெளிநாடுகளில் இருந்து அடிப்படைவாதிகளால் நிதி அனுப்பப்படுகிறது. இதனைக் கண்டறிந்து முதலில் அரசாங்கம் நிறுத்த வேண்டும். புலனாய்வுப் பிரிவினர் இதனைக் கண்டறிய வேண்டும் என்று அவர் மேலும் தெரிவித்தார்.

மோட்டார் போக்குவரத்துத் திணைக்களத்தின் ஆவணங்களை போலியாகத் தயாரித்த மூவர் இன்று கைது செய்யப்பட்டுள்ளனர். நாரஹேன்பிட்ட மோட்டார் போக்குவரத்துத் திணைக்களத்தின் அருகில் இருந்த தனியார் நிறுவனம் ஒன்றில் இருந்து அவர்கள் கைது செய்யப்பட்டுள்ளனர் ராஜகிரிய விசேட அதிரடிப்படை முகாமுக்குக் கிடைத்த ரகசியத் தகவலை அடுத்து கைது செய்யப்பட்ட சந்தேக நபர்கள் மூவரும் நாரஹேன்பிட்ட பொலிசாரிடம் கையளிக்கப்பட்டுள்ளனர் அவர்களை இன்றைய தினம் நீதிமன்றத்தில் ஆஜர்படுத்த நடவடிக்கை மேற்கொண்டுள்ளதாக பொலிசார் தெரிவித்துள்ளனர்.