இலங்கை குழந்தைகளை ஐரோப்பாவிற்கு விற்றதாக சந்தேகிக்கப்படும் மலேசிய தம்பதியரை குடிவரவு மற்றும் குடியகல்வு திணைக்கள அதிகாரிகள் குழுவொன்று கைது செய்துள்ளதாக திணைக்களத்தின் பணிப்பாளர் நாயகம் டத்தோ ரஸ்லின் தெரிவித்தார்.
ஒரு குழந்தைக்கு 30,000 முதல் 50,000 யூரோக்கள் (இலங்கை ரூபாய் 10543312 – 17572187) வரையில் தம்பதியினர் வசூலித்துள்ளதாக ரஸ்லின் குறிப்பிட்டுள்ளார்.
12 வயதுக்குட்பட்ட குழந்தைகளைக் கொண்ட மலேசியப் பெற்றோரை, தங்கள் குழந்தைகளின் பிறப்புச் சான்றிதழுடன் கடவுச்சீட்டுகளை உருவாக்க குடிவரவுத் துறைக்கு வருமாறு தம்பதியினர் வற்புறுத்தியதாக தெரிவிக்கப்பட்டுள்ளது.
பெற்றோர்கள் வரும்போது, அவர்களின் பிள்ளைகளுக்குப் பதிலாக சம வயதுடைய இலங்கைப் பிள்ளைகளை புகைப்படம் மற்றும் கைரேகை எடுக்க முன்வைத்து பின்னர் வெற்றிகரமாக கடவுச்சீட்டு பெறும் இலங்கைக் குழந்தைகளை ஐரோப்பிய நாடுகளுக்கு கடத்திச் செல்வதாக குடிவரவுத் திணைக்களத்தின் பணிப்பாளர் நாயகம். டத்தோ ரஸ்லின் மேலும் சுட்டிக்காட்டியுள்ளார்.
கடந்த 12ஆம் திகதி கோலாலம்பூர் குடிவரவு குடியகல்வு திணைக்கள அலுவலகத்திற்கு குழந்தையுடன் வந்த தம்பதியிடம் அதிகாரிகள் விசாரணை நடத்தினர்.
விசாரணையில் தம்பதியருடன் இருந்த குழந்தைக்கு மலேசிய மொழியில் பேச முடியாததால் அதிகாரிகள் அவர்களை கைது செய்தனர்.
கைது செய்யப்பட்ட சந்தேகநபர்கள் 26 மற்றும் 37 வயதுடையவர்கள் என மலேசிய பொலிஸார் தெரிவித்துள்ளனர்.
கைது செய்யப்பட்ட தம்பதியினர் ஐரோப்பாவிற்கு எத்தனை குழந்தைகள் கடத்தப்பட்டுள்ளனர் மேலும் இந்த போக்குவரத்தில் வேறு நபர்கள் ஈடுபட்டுள்ளார்களா என்பதை கண்டறிய மேலதிக விசாரணைகளை ஆரம்பித்துள்ளதாக மலேசிய பொலிஸார் சுட்டிக்காட்டியுள்ளனர்.
